اروع قصيدة تتكلم عن حال مصر للشاعر ياسر العشري

القصيدة على اليوتيوب


انسان تاني.!
كان بيدور جوا حياته
حاول يلحق كل اخواته
فضل يسئل فين الحق؟
قالو مفيش
بتسئل مين؟ يلا ياشاطر
مالناش احنا في المخاطر
اجري وشوفلك
لقمة عيش.!
شوفلك حاجه او حاجتين
شوفلك بت من الحلوين
تلهيك عنا
مش ناقصين !"
والله وعيشنا وشوفنا شباب
طالعه بتهتف "بالالعاب"
رافضه تعيش
عيشت اهاليها.
اهلها عاشت كل حياتها
خدم وعبيد لحكم نظام
بابا مبارك 30 عام
وجي الواد وسط الميادين
رافع ايده بالساعتين
رافض "يمشي"
عدى يوم.
وعدى اتنين
وبرضو يقول انا
مش "همشي"
اسف ابويا واسف جدي
اصل عيشتكم
مش على ادي
انا رافض اسيب كل حقوقكم
عايز حقي من الى سرقكم
سكتو وعيشتو عيشه هباب
في قلب الثورة ماتو شباب
خلعو مبارك برضو شباب
من امن الدولة شوفنا "عذاب"
اوعا تميل للاحزاب
يامن كنتم سبب وجداني
صديقي مات بين احضاني
حملني امانه تقيله عليا
ف وسط بلادي كنت ضحيه
كان وقتها وشو بيضحك
لسا فاكر كل "ملامحك"
قالى انا همشي وانت مكمل
في وسط ميدانك اوعا تسلم
حلم شبابنا اوعا يضيع
ومهما شاروك اوعا تبيع
سلم على كل الاحباب
انا والموت كنا "اصحاب"
ف وسط ميدان اسمو التحرير
قالو علينا شباب "فرافير"
اسف عمي ..
واسف خالي..
لسا وصية "صاحبي" ف بالي
سمعنا منكم ياما كلام
اكيد من حقي
اني ابقا "اناني"
بعد ما عشتو
ال 30 عام
قولت اتحول
‫#‏انسان‬ تاني
اسف ، اسف
وكمان اسف
اسف اني رافض "انا"
اعيش ظلم الـ 30 سنة